வாங்க பகிரலாம்

நொவெல் இன்புளுவென்சா ஏ - எச் 1 என் 1 வைரஸ் / Novel Influenza A H1 N1

2009-12-22T17:10:00.000-08:00

' இலங்கையில் இதுவரை (10.12.2009) நொவெல் இன்புளுவென்சா ஏ - எச் 1 என் 1 எனப்படும் வைரஸ் தொற்றுக்குள்ளாகி 23 பேர் மரணமடைந்துள்ளனர். 420 பேர் நோய்த்தொற்றுக்குள்ளாகி இருப்பது உறுதிப்படுத்தப்பட்டுள்ளது.'

இது போன்ற செய்திகளை நாளும் நாம் கேட்டவண்ணம் இருக்கிறோம். எனவே இந்தத் தருணத்தில் இந்நோய் பற்றிய சிலவிடையங்களை நாம் அறிந்துகொள்வது முக்கியமானதாகும்.

இன்புளுவென்சா ஏ - எச் 1 என் 1 என்பது ஒருவகை வைரஸ். இது சுவாசத்தொகுதி மீது தாக்கத்தை ஏற்படுத்தி அதில் நோயை உண்டாக்கும் அதேவேளை , இலகுவில் ஒருவரில் இருந்து மற்றொருவருக்குத் தொற்றும் தன்மையையும் கொண்டதாக இருக்கிறது.

சாதாரண வைரஸ் காய்ச்சல் போல தானாகவே சில நாட்களால் மாறிவிடும் இந்தக்காய்ச்சல் பற்றி நாம் இத்தனைதூரம் கவலைப்பட இன்புளுவென்சா காய்ச்சலுக்கென்று ஒரு துயரவரலாறு இருப்பதுதான் காரணம்.

1918 இல் இன்புளுவென்சா காய்ச்சலுக்குள்ளானவர்களுக்கு சிகிச்சையளிக்கப்படும் ஒரு அவசர வைத்தியசாலை ஒன்றையே நீங்கள் படத்தில் காண்கிறீர்கள். Spanish Flu என்று பெயரிடப்பட்ட இக்காய்ச்சல் உலகில் மிகப்பெரிய மனித அழிவு ஏற்படக் காரணமாக இருந்தது. சுமார் 40 மில்லியன் உயிரிழப்புகளுக்குக் காரணமாக அமைந்த இந்த நோய் பெருமளவில் 20 -50 வயதினரைத் தாக்கியது.இந்நோய்த் தாக்கத்தால் முதலாம் உலகப்போரில் பங்குகொண்ட பல படைவீரர்கள் மரணமானார்கள்.

இந்தத் துயர வரலாறு 1957 இல் Asian Flu ஆக இரண்டு மில்லியன் மக்களையும், 1968 இல் Hong Kong Flu ஆக ஒரு மில்லியன் மக்களையும் பலிகொண்டது. தொடர்ந்து, காலத்துக்குக் காலம் தனது கட்டமைப்பை மாற்றிக் கொள்கின்ற இந்த வைரஸ் மீண்டும் 2009 ஆம் ஆண்டு சித்திரை மாதம் முதன்முதலில் இனங்காணப்பட்டது. அது உலகம் முழுவதும் விரைவிலேயே பரவி பெரும் தாக்கத்தை உண்டு பண்ணியது. இதுவரை WHO (18.12.2009) அறிக்கையின்படி 10,582 உயிரிழப்புக்களை இது ஏற்படுத்தி இருக்கிறது.

இந்தப் புதுவகையான வைரஸ். பன்றிகளில் இன்புளுவென்சா காய்ச்சலை ஏற்படுத்துகின்ற வைரஸின் குண இயல்பையும், பறவைகளுக்கு இன்புளுவென்சா காய்ச்சலை ஏற்படுத்துகின்ற வைரஸின் பரம்பரை இயல்பையும் கொண்டிருப்பதோடு, மனிதனுக்கு சாதாரண சளிச்சுரத்தை ஏற்படுத்துகின்ற வைரஸின் பரம்பரை இயல்பையும் கொண்டிருக்கிறது.

இத்தகைய இயல்பு காரணமாக novel (never seen before) என்றழைக்கப்படும் இவ்வைரஸ் காய்ச்சல் பற்றிய போதிய அறிவு பொதுமக்களுக்குச் சென்றடையவேண்டிது காலத்தின் கட்டாயமாக இருக்கிறது.

H1N1 தொடரும்.........

பாம்புக்கடி - தவிர்க்கும் வழிமுறைகள்

2009-08-23T06:35:00.000-07:00

பாம்புக்கடி - NEGLECTED TROPICAL DISEASE என்னும் பதிவிற்கு மருத்துவர் RENUKA SRINIVASAN (UNIVERSITY OF EAST LONDON ) அவர்கள் எழுதிய மறுமொழியுடன் கூடிய உதவிக்குறிப்பு இங்கு பகிர்தலுக்காக பதிவாக்கப்பட்டுள்ளது.

பயனுள்ள படைப்பு. இத்துடன் பாம்பு கடிக்காமல் எம்மை எவ்வாறு பாதுகாத்துக் கொள்ளலாம் என்பதையும் இணைத்துள்ளேன்.

1. பாம்புகள் கூடுதலாக இனம் காணப்பட்ட பகுதிகளில் வசிப்பவர்கள் கால்களை மூடக்கூடிய பாதணிகளையும் (Shoes and Boots) நீண்ட உடையையும் (long pants) அணிவதன் மூலம் பாதுகாத்துக் கொள்ளலாம் .

2. பாம்புகள் வழக்கமாக வசிக்கும் இடங்கள், அவை வெளி வரும் நேரங்கள், நச்சுத் தன்மை கூடிய பாம்புகளையும் நச்சுத் தன்மையற்ற பாம்புகளையும் இனம் காணும் அறிவை வளர்த்துக் கொள்ளல்.

3. கண்களால் பார்க்க முடியாத இடங்களுள் (கற்குகைகள், புதர்கள் மரப்பொந்துகள்) விரல்களையோ கைகளையோ உள்ளே நுழைப்பதைத் தவிர்க்க வேண்டும் (விசேடமாக சிறுவர்கள்).

4. இரவுகளில் வெளியே செல்வதாயின் வெளிச்சத்தை தரக்கூடிய விளக்கு/ torch யினை எடுத்துச் செல்லவேண்டும்.

5. இரவில் செல்வதாயின் தடியொன்றின் மூலம் நிலத்தில் தட்டுவதன் மூலம் ஏற்படும் அதிர்வினால் பாதையில் இருக்கும் பாம்பு விலகிச் செல்ல வாய்ப்புண்டு.

6. பாம்பைக் கண்டால் அடிப்பதையோ விளையாடுவதையோ கற்களால் எறிவதையோ தவிர்த்து விலகிச் செல்வது நல்லது.

7. இறந்து கிடக்கும் பாம்புகளிடமிருந்து கூட விஷம் பரவக் கூடிய சாத்தியமிருப்பதால் அவற்றைக் கைகளில் எடுப்பதைத் தவிர்த்துக்கொள்ளவும்.

8. உயிரினம் அடையாளம் காணப்படாத எந்தக் கடியாக (unknown bite) இருப்பினும் அலட்சியம் செய்யாது வைத்தியசாலையைச் சென்றடையவும்.

9. பாம்புகள் கூடுதலாக இனம் காணப்பட்ட பகுதிகளில் வசிப்பவர்கள்
இரவில் உறங்க முன் படுக்கைகளைப் பரிசோதிப்பதுடன்
நித்திரையின் போது ஏதாவது கடித்த அல்லது குற்றியதாக குழந்தைகள் கூறும் போது உடன் கவனம் எடுக்கவும்.

10. MSF விடுதியொன்றில் நான் கண்ட பாம்பு வராமல் தடுக்கும் மிகவும் எளிய முறையொன்றையும் எழுதுகிறேன். வீட்டையும் வளவையும் சுற்றி வரவுள்ள நான்கு மூலைகளிலும் மரக்கட்டைகளை அடித்து அவற்றில் கராஜ்களில் கிடைக்கும் கழிவு எண்ணெயில் தோய்த்த கயிற்றினை நிலமட்டத்துடன் சதுரமாக கட்டுவதன் மூலம் வீடுகளினுள் பாம்புகள் வராமல் தடுக்கலாம். கழிவு எண்ணெயின் மணம் குறையும் போது கயிறுகள் மாற்றப்பட வேண்டும் (ஆறு மாதங்கள்).

இவற்றை படிப்பறிவில்லாத பாமர மக்களிற்கு எப்படிச் சென்றடைய வைப்பீர்கள்?

Dr.RENUKA SRINIVASAN

எமது பிரதேசத்தின் பெரும்பாலான தமிழ் ஊர்களில் நீண்ட நாட்களின் பின்னர் மக்கள் குடியமர்ந்துள்ளதால் அங்கு பாம்புக்கடிக்குள்ளாகுவோர் எண்ணிக்கை மிக அதிகமாக உள்ளது.

எனவே அப்பகுதிகளைச் சேர்ந்த உயர்கல்விகற்ற மாணவர்களுக்கு இவை மருத்துவ கையேடுகளாக வழங்கப்பட்டு சாதாரணமக்களைச் சென்றடையச் செய்யப்பட உள்ளது.

தங்களது ஜீவநதிக்கான தொடர்ச்சியான பங்களிப்புக்கு மிக்க நன்றிகள்.

மாரடைப்பு, கொலஸ்ரோல் படிவு - வீடியோ விளக்கம்

2009-08-04T10:40:00.000-07:00

உயர் குருதியமுக்கம், மாரடைப்பு, பாரிசவாதம் என்பன அதிகளவிலான மரணங்களை ஏற்படுத்துகின்ற காரணிகளாக இருக்கின்றன.

இருதயம் எமது உடலிற்குத் தேவையான குருதியை உடல் முழுக்கச் செலுத்துகின்றது. இருதயம் தனக்குத்தேவையான பிராணவாயுவையும், சக்தியையும் இரத்தக் குழாய்களின் மூலம் பெறுகிறது.

இவ் இரத்தக் குழாய்களில் படிப்படியாக கொழுப்பு சிறுவயதிலேயே படிய ஆரம்பித்துவிடும். இவ்வாறு கொழுப்பு படிவதால் இரத்தோட்டம் பகுதியாகவோ அல்லது முழுமையாகவோ தடைப்படும். இதனால் இருதயம் வேகமாக வேலைசெய்ய வேண்டி இருக்கும் போது அதற்கு மேலதிகமாக தேவைப்படும் பிராண வாயுவும், சக்தியும் கிடையாததால் மார்பு வலி ஏற்படும்.

(படத்தில் இதயவறைச் சுவர், கொழுப்பு படிந்த குழாய்களில் குருதி கட்டிபடுவதால் அக்குருதிக்குளாய் மூலம் பிராண வாயுவையும், சக்தியையும் பெறும் பகுதி முதிலில் பாதிக்கப்படுவதையும் ( Ischemia) பின்னர் அது சேதமாவதையும் (Injury) இறுதியாக இறந்து விடுவதையும் (Infarction) காண்கிறீர்கள்)

கொழுப்பு படிந்த குழாய்களில் குருதி கட்டிபடுவதால் அக்குருதிக்குளாய் மூலம் பிராண வாயுவையும், சக்தியையும் பெறும் பகுதி இறக்கும். இதுவே மாரடைப்பு எனப்படும்.

முழுமையாக அடைப்பு ஏற்படின் திடீர் மரணம் ஏற்படலாம். இதே போல் மூளைக்குச் செல்லும் இரத்தக் குழாய்களில் அடைப்பு ஏற்பட்டால் பாரிசவாதம் ஏற்படும்.

எமது அனைவரின் குருதியிலும் கொழுப்புகள் காணப்படுகின்றது. இவை குறிப்பிட்ட அளவிற்கு அதிகமாக ஒரு சிலரின் குருதியில் காணப்படும். இது HYPER LIPIDAEMIA என அழைக்கப்படும்.

இதனைத் தவிர்க்க உங்கள் குருதியிலுள்ள கொழுப்பின் அளவை வருடத்திற்கு ஒரு தடவையேனும் பரிசோதித்துப் பார்க்க வேண்டும்.

குருதியில் கொழுப்பு அதிகஅளவில் காணப்படின் உணவில் கீழ் கூறப்படும் மாற்றங்களை ஏற்படுத்துவதாலும், தேக அப்பியாசத்தின் மூலமும் குருதியிலுள்ள கொழுப்பைக் குறைக்கலாம். இரண்டிற்கும் குருதியிலுள்ள கொழுப்பு குறையாவிடின் வில்லைகளைத் தொடர்ந்து பாவித்து இதனைக் குறைக்க வேண்டும்.

நீங்கள் அதிகஅளவு கொழுப்பு எண்ணையை உணவில் சேர்த்தால் அது உங்கள் இரத்தக்குளாய்களில் படிந்து இருதயத்துக்கு இரத்தம் செல்வதைத் தடுக்கும்.

இதனைத் தவிர்க்க

மிகக் குறைந்த அளவு மிருகக் கொழுப்பை உண்ணவும்/ தவிர்க்கவும்.

பொரித்த உணவுகளை உண்பதைக் குறைக்கவும்.

நெய், தேங்காய்ப்பால், CHEESE, BUTTER, MARGARINE, சிவப்பு இறைச்சி, ஊறுகாய், அச்சாறு, முட்டை மஞ்சள் கரு, ஈரல், மூளை ஆகியவற்றை உண்ணபதைக் குறைக்க வேண்டும்.

ஆடைநீக்கிய பால்மா (NON FAT) பாவியுங்கள்.

மீன் தேவையான அளவு உண்ணலாம்.

கூடியளவில் நார்த்தன்மையான உணவை உண்ணுங்கள்.
உதாரணம் பழங்கள், இலைக்கறிவகைகள், அவரையினம், கோவா, தானியங்கள்.

கொலஸ்ரோல் படிவு - வீடியோ விளக்கம்

Understanding Asthma - Video Animation

அபாய அறிகுறிகள் -டெங்குக் காய்ச்சல்/DENGUE FEVER

2009-07-01T21:38:00.000-07:00

டெங்குக் காய்ச்சல் நுளம்பினால் பரப்பப்படும் ஒரு நோய். இந்நோய்பற்றிய சில தகவல்கள்.

டெங்கு நோயின் பாதிப்புக்கள்

டெங்கு நோயின் சாதாரண அடையாளங்கள்

@ கடும் காய்ச்சல்

@ தலைவலி

@ வாந்தி

@ உடல்வலி

@ வயிற்றுளைச்சல்

சாதாரணமாக 3 அல்லது 4 தினங்களின் பின் நோய்குணமாகிவிடும். எனினும் சிலருக்கு டெங்குக் குருதிப்பெருக்கு நோய் ஏற்படக்கூடும்.

டெங்குக் குருதிப்பெருக்கு நோயின் அறிகுறிகள்

@ தோலின் அடியில் சிறிய சிகப்பு அடையாளம் தோன்றுதல்

@ கண்கள் சிகப்பு நிறமாதல்

@ முரசினால்,மூக்கினால் இரத்தம் கசிதல்

@ மல, சலத்துடன் இரத்தம் வெளியேறுதல்

@ கடுமையான வயிற்று நோ

@ வாந்தி , மலம் கறுப்பு நிறமாதல்

இவை அபாய அறிகுறிகளாகும். இதனுடன் டெங்கு அதிர்ச்சி நிலையைக்குறிக்கும்

@ உடல் வெளிறல்

@ உடம்பு குளிர்ந்து போதல்

@ கலக்கமான, தூக்கமான நிலை

@ மூச்சுத்திணறல்

இவ்வாறான நோய் அடையாளங்கள் உள்ள நோயாளிகளுக்கு உடனடியாக வைத்தியசாலைச் சிகிச்சை அவசியமானதாகும்.

நாம் என்ன செய்ய வேண்டும்

@நோய் பரப்பும் நூளம்புகளைக் கட்டுப்படுத்தல்

@நோயாளிக்கு போதிய ஓய்வு கொடுத்தல் - விசேடமாக பிள்ளைகளைப் பாடசாலைக்கு அனுப்பாமல் ஓய்வெடுக்கச் செய்தல்

@அதிகளவில் நீராகாரம் அருந்துதல்

கொதித்தாறிய நீர்

சோற்றுக்கஞ்சி

சூப்

பழரசம்..

@சிகப்பு, கறுப்பு நிற ஆகாரங்களைத் தவிர்த்தல்

@'அஸ்பரின்' வகை மருந்துகளைத் தவிர்த்தல்

@பரசிற்றமோல் சரியான அளவில் கொடுத்தல்

டெங்குக் காய்ச்சல் பற்றி சந்தேகம் ஏற்பட்டால் உடனே வைத்தியசாலைக்கு அழைத்துச் செல்லுதல்.

படங்கள் - நன்றி இணையம்

பாம்புக்கடி - NEGLECTED TROPICAL DISEASE

2009-06-26T20:59:00.000-07:00

இலங்கையில் வருடமொன்றுக்கு 600 க்கு மேற்பட்டோரைப் பலியெடுக்கும் ஒரு துர்நிகழ்வாக விசப்பாம்புக்கடி இருக்கிறது. இந்தியாவில் ஆண்டுக்கு 11,000 மரணங்களும் , தெற்காசியாவில் 14,000 மரணங்களும் , உலகில் ஆண்டொன்றுக்கு 94,000 மரணங்களும் பாம்புக்கடியால் நிகழ்வதாக தெரிவிக்கப்படுகிறது.

உண்மையில் இந்த எண்ணிக்கை தொற்றுநோய்களால் ஏற்படும் மரணங்களை விட அதிகமானது என்பதும், அதுபற்றி யாரும் அலட்டிக்கொள்வதில்லை என்பதும் கசப்பான உண்மையாகும். இதனால் இது neglected tropical disease என்றழைக்கப்படுகிறது.

எனவே பாம்புக்கடி தொடர்பான முதலுதவி முறைகளை நாமனைவரும் அறிந்து வைத்திருப்பது அவசியமாகிறது. அவைபற்றி மிகச் சுருக்கமான விளக்கங்களைப் பார்ப்போம்.

ஒருவர் பாம்புக்கடிக்குள்ளானால் இயன்றவரை பாதிக்கப்பட்டவரை பதற்றமடையச் செய்யவேண்டாம். பதற்றமடைந்தால் இதயத்துடிப்பு வேகம் அதிகரிக்கும். இதனால் நஞ்சு விரைவாக உடலில் பரவலாம். எனவே மருத்துவம் மூலம் குணப்படுத்த முடியும் என நம்பிக்கையளித்து அவரது பதட்டத்தை குறைக்க முயற்ச்சிக்க வேண்டும்.

கடிபட்டவருக்கு எல்லாவகைப் பாம்புகளும் அபாயமானதல்ல என்று விளக்கவேண்டும். அத்துடன் கடிபட்ட அனைவருக்கும் விசம் ஏறி இருக்கவேண்டிய அவசியமில்லை என்பதையும் உறுதிபடத் தெரிவிக்க வேண்டும்.

காயத்தை சவர்க்காரமிட்டு ஓடும் நீரில் கழுவவேண்டும். காயமடைந்த இடத்தைக் கூரிய ஆயுதங்களால் கிழிக்க வேண்டாம். கடிபட்ட பாகத்தை அசையாது வைத்திருந்தால் அது இரத்த ஓட்டத்தை மந்தப்படுத உதவம்.

முடிந்தால் பாம்பின் வகையை கேட்டறிந்து கொள்வது மருத்துவத்துக்கு உதவியாக இருக்கும்.

ஆபத்தான நான்கு நச்சுப்பாம்புகள்

நாகம்
எண்ணெய் விரியன்
சுருட்டைப் பாம்பு
கண்ணாடி விரியன்

கடிவாயின் மீது கீறுவதோ,உறுஞ்சுவதோ, கட்டுவதோ தவிர்க்கப்படல் வேண்டும். கட்டுப் போடுவதன் மூலம் சில சமயங்களில் விஷம் ஓரிடத்திலேயே தங்குவதால் கலங்கள் இறக்கக்கூடும். வாய்வைத்து உறிஞ்சும் போது வாயில் புண் இருந்தாலோ அல்லது நாக்கு போன்ற விரைவாக உறிஞ்சக் கூடியவை நஞ்சினை உறிஞ்சக் கூடும். இதனால் பாம்புக் கடிக்கு உள்ளானவர் தவிர முதலுதவியாளரும் ஆபத்துக்கு உள்ளாகலாம்.

“ஆஸ்பிரின்” “மதுபானம்”; என்பன கொடுத்தலைத் தவிர்க்கப்படல் வேண்டும்.

உடன் வைத்தியசாலைக்கு கடிபட்டவரை கொண்டு செல்ல வேண்டும்.

சரியான முதலுதவிகள் செய்வதன் மூலமும், மருத்துவம் மூலமும் பாம்புக்கடியினால் ஏற்படும் பெரும்பாலான இறப்புக்களைத் தவிர்க்க முடியும்.

காச நோய் - சில உதவிக்குறிப்புக்கள்...

2009-06-21T23:54:00.000-07:00

இப்பதிவு பற்றிய மேலதிக தகவல்களைப்பெற

காச நோய் - TUBERCULOSIS
காச நோயற்ற உலகு.
கலவரம் தரும் நிலவரம் - காசநோய் TUBERCULOSIS

தொடர்புகளுக்கு

The National Programme for Tuberculosis Control and Chest Diseases

Address : Public Health Complex
555/5, Elvitigala Mawatha
Narahenpita
Colombo 05
Sri Lanka

Telephone : (94) 011-2368276, 011-2368386

Facsimile : : (94)011-2368386

dnptccd@gmail.com

இணையம் -

http://203.94.76.60/TBWeb/index.htm

அண்மையில் NPTCCD, IMPA ,GFATM
என்பன இணைந்து நடாத்திய செயலமர்வில்
எனக்குக் கிடைத்த தகவல்களைப்
பகிர்ந்திருக்கிறேன்.

உங்களுக்கு காசநோய்த்தொற்று இருக்குமென
சந்தேகித்தால் நீங்களாகவே அருகிலுள்ள
காசநோய் சிகிச்சை நிலையத்துக்குச் சென்று
பரிசோதிக்கலாம்.

உங்களுக்கு காசநோய்ச் சிகிசைக்காக
வைத்தியசாலை செல்ல சங்கடமாக
இருந்தால் உங்கள் குடும்ப வைத்தியரிடம்
சிகிச்சை பெறலாம். உங்களுக்குரிய மருந்துகள்
இலவசமாக வழங்கப்படும்.

கலவரம் தரும் நிலவரம் - காசநோய்(TUBERCULOSIS )

2009-06-21T13:36:00.000-07:00

இப்பதிவு பின்வரும் தலைப்புக்களிலான பதிவுகளின் தொடர்ச்சி

காச நோய் - TUBERCULOSIS

காச நோயற்ற உலகு..

முறையான சிகிச்சை மூலம் பூரணமாக குணப்படுத்தக் கூடிய காசநோயினால்

ஒவ்வொரு செக்கனும் உலகில் ஒருவர் நோய்த்தொற்றுக்கு உள்ளாகிறார்.(Infected with TB)
ஒவ்வொரு நான்கு செக்கனுக்கும் ஒருவர் உலகில் காசநோயாளியாகிறார்.(ACTIVE TB DISEASE)
ஒவ்வோரு 15 செக்கனுக்கும் ஒருவர் காசநோயினால் மரணமடைகிறார்.

({{Information |Description=World map showing reported cases of tuberculosis per 100,000 citizens. Red = >300, orange = 200-300; yellow = 100-200; green 50-100; blue = <50 grey =" n/a." source=""> 19 May 2008 from

WHO 2006 report[http://www.who.int/glob)

உலகில் அதிகூடிய அளவில் காசநோயால் பாதிக்கப்பட்ட நாடு ஆபிரிக்கா , அடுத்த நிலையிலுள்ள ஆறு நாடுகள்..

இந்தியா
சீனா
இந்தோனேசியா
பங்களாதேஷ்
பாகிஸ்தான்
பிலிப்பைன்ஸ்

இலங்கை நிலவரம்

2007 இல் காசநோயால் மரணமடைந்தவர்கள் 206 பேர்.

2007 இல் புதிதாக காசநோயாளிகளாக அடையாளம் காணப்பட்டவர்கள் 8497 பேர்

அதிகளவான நோயாளர்கள் உள்ள இடங்கள்

கொழும்பு- (அதிகளவில்;-மோதரை, மாளிகாவத்தை, தெமட்டகொடை)
கம்பஹா
கண்டி
களுத்துறை

2007 நிலவரம் - நோயாளர் எண்ணிக்கை

கொழும்பு -1474
கண்டி - 864
யாழ்ப்பாணம் -461
மட்டக்களப்பு - 168
திருகோணமலை - 120
வவுனியா- -92
கிளிநொச்சி - 35

அறிவோம்

சிந்திப்போம்

செயற்படுவோம்

காச நோயற்ற உலகு..

2009-06-17T07:04:00.000-07:00

(இப்பதிவு காச நோய் - TUBERCULOSIS என்னும் பதிவின் தொடர்ச்சி...)

காசநோய் ஒரு மிகப் பழைய நோயாக இருப்பினும் , அது உலகம் முழுவதும் குறிப்பாக வளர்முக நாடுகளில் ஒரு பெரும் பிரச்சனையாக இருந்து வருகிறது.

உலக சனத்தொகையில் கிட்டத்தட்ட மூன்றில் ஒரு பகுதியினர் (அதாவது இரண்டு பில்லியன் மக்கள்) காசநோய்க் கிருமி தொற்றியவர்களாக உள்ளனர்.

உலக சுகாதார அமைப்பின் 2004 ம் ஆண்டிற்கான அறிக்கையின் படி இலங்கையில் காசநோயாளர் மரணவீதம் 1000 பேருக்கு 54 பேர் ஆகும்.

எனவே காரணம் தெரியாத நோய்பற்றியெல்லாம் அதிகம் அலட்டிக்கொள்ளும் நாம், முறையான சிகிச்சை மூலம் பூரணமாக குணப்படுத்தக் கூடிய காசநோய் பற்றி அறிவதும், அதனைத் தடுக்க உதவுவதும் இன்றியமையாதாகிறது.

நாம் என்ன செய்ய வேண்டும் ?

§ BCG தடுப்பூசி குழந்தை பிறந்து நான்கு கிழமைக்குள் கொடுக்கப்பட வேண்டும். இதன்போது தழும்பொன்று உருவாகும். இத்தழும்பு உண்டாகாதவிடத்து ஆறுமாதம் தொடக்கம் ஐந்து வயது காலத்திற்குள் இவ்வூசி மீண்டும் கொடுக்கப்பட வேண்டும்.

§ மூன்று கிழமைகளுக்கு மேல் இருமல் இருக்குமிடத்து உடனடியாக மருத்துவ ஆலோசனையைப் பெறவும்

§ சன நெரிசலான இடங்கள், சூரிய வெளிச்சம் உள்வராத வீடுகள் இந்நோய் பரவுவதை ஊக்குவிப்பனவாகும்.

§ போசாக்குக் குறைபாடு இலகுவில் இந்நோய் தொற்ற வழிவகுக்கும்

§ பசுப்பாலினாற் பரவுங் காசநோயைத் தவிர்க்க நன்கு கொதிக்க வைத்த பால் அல்லது பாய்ச்சர் முறையிற் பதனிட்ட பாலை அருந்தவும்

காசநோயாளியின் பொறுப்புக்கள்

· சிகிச்சையை குறிப்பிட்ட காலம் வரை தொடர்ந்து எடுக்க வேண்டும்.

· சிகிச்சை ஆரம்பித்த சில நாட்களிலேயே நோயின் அறிகுறிகள் மறைந்தாலும் தொடர்ந்து மருந்து சாப்பிட வேண்டும்.

· சிகிச்சையை போதிய காலத்திற்கு முன்பாக நிறுத்தவோ அல்லது தவிற்பதோ கூடாது.

· சிகிச்சை காலத்தில் ஏற்படும் உடல்நலக் குறைவுகளை உடனே மருத்துரிடம் தெரிவிக்கவும்.

· குறிப்பிட்ட காலங்களில் சளி பரிசோதனை செய்து கொள்ள வேண்டும்.

நோய் மற்றவர்களுக்கு பரவாமல் இருக்க ஒரு நோயாளி செய்ய வேண்டியவை...

· கண்ட இடங்களில் சளியைத் துப்பக்கூடாது

· இருமும் போது வாயை துணியால் மூடிக்கொள்ளவும்

· சளியை மூடியுள்ள குப்பியில் துப்பி எரித்துவிட வேண்டும்.

நோயாளிகளைக் குணமாக்குதல் , நோய்த்தொற்றுக்குள்ளானவரைக் கண்டு பிடித்தால் , மேலும் நோய்பரவாமல் பார்த்துக்கொள்ளுதல் என்பன காசநோயற்ற உலகினை உருவாக்குவதற்கான வழிமுறைகளாகும்.

மேலதிக தகவல்களுக்கு கீழுள்ள படத்தினைச் சுட்டுங்கள்...

காச நோய் - TUBERCULOSIS

2009-06-15T22:59:00.000-07:00

காசநோய்க்கிருமி தொற்றி நோய் அறிகுறிகள் உள்ளவர்கள் காசநோயாளிகளாக இனங்காணப்படுகின்றனர்.

நுரையிரலில் தொற்று இருப்பின் நுரையீரல் காசநோய் என்றும்,நிணநீர்க் கணுக்கள் , எலும்புகள் ,மூட்டுக்கள் ,இனப்பெருக்க ,சிறுநீர்க் கால்வாய் ,மூளை மென்சவ்வு ,உணவுக்கால்வாய், நுரையீரலைச் சுற்றியுள்ள சவ்வு என்பதில் ஒன்றைக் காசநோய்க் கிருமி பாதித்திருந்தால் அது நுரையீரல் அல்லாத காசநோயாக கருதப்படுகிறது.

எப்போதும் நமக்கோ அல்லது நம்மைச் சார்ந்தவர்களுக்கோ நோய்வருமென்று அறிந்தால் மட்டுமே அதுபற்றி கவனமெடுக்கும் நாம் இந்நோய் பற்றி ஏன் அறிந்துகொள்ள வேண்டும்...

உலக சனத்தொகையில் மூன்றில் ஒரு பகுதியினர் காசநோய் தொற்றுடையவர்களாக இருக்கின்றனர். இந்த வட்டத்துள் நாமும் இருக்கலாம். ஏனெனில் காசநோய் கண்ட (நுரையீரல் காசநோய்) நபரிலிருந்து சளியுடன் வெளியேறும் கிருமி காற்றின் மூலம் மற்ற நபர்களுக்கு பரவுகிறது. இந்நோய் கண்ட நபர் மூலம், ஒரு வருடத்தில் 10 அல்லது அதற்கு மேற்பட்ட நபருக்கு இந்நோய் தொற்றும்.

கிழே உள்ள படம் வளர்முக நாடுகளிலேயே அதிகமாக காசநோயாளிகள் இருப்பதைக் காட்டுகிறது. வளர்முக நாடுகளில் வருடாந்தம் இரண்டு மில்லியன் மக்கள் மரணிப்பதாக மதிப்பிடப்பட்டுள்ளது.

எனவே மூன்று வாரங்களுக்கு மேல் தொடரும் இருமலுடன் பின்வரும் அறிகுறிகளில் ஒன்று அல்லது பல

நிறைகுறைதல்
களைப்பு
காச்சல் குறிப்பாக மாலை நேரங்களில்
மார்பு வலி
குறுஞ்சுவாசம்
உணவில் விருப்பமின்மை
இருமலின் போது இரத்தம் வெளியேறுதல்

தென்பட்டால் உடனடியாக மருத்துவ ஆலோசனையை நாடவேண்டும். அத்துடன் முறையான சிகிச்சையைப் பெற்றுக்கொள்ள வேண்டும்.

முறையான மருத்துவம் மூலம் பூரணமாக குணப்படுத்தக் கூடிய இந்நோயுடைய நோயாளி ஒருவர் தகுந்த சிகிச்சை எடுக்காமலிருப்பது பாரதூரமான குற்றமாகும். ஏனெனில் அவர் தான் மட்டுமல்லாமல் தன் குடும்பத்தினருக்கும் , வேலைத்தள சக ஊழியர்களுக்கும் ,மற்றும் பலருக்கும் நோய்த்தொற்று ஏற்படக் காரணமாக அமைகிறார்.

Tuberculosis is back

இந்நோய்பற்றி அறிந்துள்ள அனைவரும் மற்றவர்களுக்கு இந்நோய்பற்றிய விழிப்புணர்வை ஏற்படுத்த வேண்டிய கடப்பாடு உடையவர்களாக இருக்கிறோம். ஏனெனில் அது தொற்றும் அபாயத்தில் நாமும் இருக்கிறோம்.

செய்தி - முறையான மருத்துவம் மூலம் பூரணமாக குணப்படுத்தக் கூடிய நோய் காச நோய் - TUBERCULOSIS.

ஒன்றிணைவோம்

முயல்வோம்

சாதிப்போம்

கொஞ்சு(ச)ம் க(வி)தைகள்: இலங்கையில் ஒரு தமிழனின் சாதனை

2009-06-15T20:36:00.000-07:00

இணைப்பை வாசிக்க - கொஞ்சு(ச)ம் க(வி)தைகள்: இலங்கையில் ஒரு தமிழனின் சாதனை

நண்பன் புஷ்பகாந்தனுக்கு பாரட்டுக்களும், வாழ்த்துகளும் ...

நன்றி மயாதி

//பல் குழல் பீரங்கிகளின் சத்தங்களின் மத்தியில் இருந்து கொண்டு , தொடர்ச்சியான மின்சார வசதிகள் கூட இல்லாத நிலையிலே படித்தும்,///

பழசெல்லாம் ஞாபகம் வருகிறது...
//பட்டவர் அன்றி
மற்றவர் புரிந்திடா
உணர்ச்சிகளின் குவியல்//

மீண்டும் புஷ்பக்காந்தன்,கோபி இருவருக்கும் வாழ்த்துக்கள்.

////நமக்குத்தானே வலைப் பூக்கள் உள்ளன, இந்த செய்தியை உங்கள் தளங்களிலும் பிரசுரியுங்கள்///

http://vaankapakiralam.blogspot.com/2009/06/blog-post_15.html#links

நன்றி - மயாதி

வாங்க பகிரலாம்

2009-03-24T08:57:00.000-07:00

வணக்கம்,
நலமா ?

முன்பே சொன்னது போல் இது பகிரலுக்கான தளம். எனவே கேள்விகளோடு ஆரம்பிக்கிறேன்.
{ கேட்பதுதானே இலகு }

* உங்களில் எத்தனை பேருக்கு உங்கள் தற்போதய உடல்நிறை, உயரம் தெரியும் ? { 50 kg க்கு அரைக் kg தான் குறைவென்று குத்துமதிப்பாய்ச் சொல்லப்படாது }

* ஒவ்வொரு நாளும் உடற்பயிற்சி செய்பவரா நீங்கள் ? அல்லது ஒரு கிழமைக்கு நான்கு நாளேனும் உடற்பயிற்சி செய்கிறீர்களா ?
{ கேட்கவே மூச்சிரைக்கிறதா ? }

* உங்கள் உணவில் காய்கறி வகைகளை அதிகம் சேர்த்துக் கொள்கிறீர்களா ? ஒவ்வொரு நாளும் உணவின்பின் ஒருபழமேனும் உண்ணக் கிடைக்கிறதா ?
{ காய்கறி விலையாவது தெரியுமா ? }

* நீங்கள் 35 வயதைத் தாண்டியவரா ? அப்படியாயின் ஒருமுறையேனும் இரத்தத்தில் குளுக்கோசு , கொழுப்பின் அளவை பரிசோதித்ததுண்டா ? இறுதியாக எப்போது இரத்தழுத்தம் சோதித்தீர்கள் ?

* நீங்கள் சிறந்த புகைபிடிப்பாளரா ? அப்படியாயின் இந்த வருடத்தில் புகைப்பிடிக்கும் பழக்கத்தை நிறுத்த எப்போதாவது முயற்சித்ததுண்டா ?

* மது உங்களுக்கு அடிமையா ? அல்லது மறுதலையா ?

* உங்கள் பரம்பரைக்கு உள்ள நோய்பற்றி ஏதேனும் அறிந்து வைத்திருக்கிறீர்களா ?

இத்தனை கேள்விகளக்குப் பின்னால் அப்படி என்ன பெரிய பிரச்சனை இருக்கப்போகிறது என்றுதானே யோசிக்கிறீர்கள். உலக சகாதார ஸ்தாபனம் வெளியிட்டுள்ள இந்த அறிக்கையைப் பாருங்கள்.

Noncommunicable diseases now biggest killers

says WHO's World health statistics 2008
19 MAY 2008 GENEVA -- The global burden of disease is shifting from infectious diseases to noncommunicable diseases.
The shifting health trends indicate that leading infectious diseases – diarrhoea, HIV, tuberculosis, neonatal infections and malaria – will become less important causes of death globally over the next 20 years.

அதாவது வரப்போகும் இருபது ஆண்டுகாலப் பகுதியில் தொற்றும் தன்மையற்ற நோய்கள்தான் உலகில் உயிர்கொல்லி நோய்களாக உருவெடுக்கப்போகிறது என்று எதிர்வு கூறுகிறது இந்த அறிக்கை.

தொற்றுநோய்கள் பற்றி பரபரப்பான செய்திகளை வாசித்து விழிபிதுங்கி இருக்கும் நமக்கு இந்த அறிக்கை இன்னொரு அதிர்ச்சியை ஏற்படுத்துகிறது.

தொற்றும் தன்மையற்ற நோய்கள்
{ Noncommunicable diseases }

இந்நோயானது தொற்றுநோய்க் கிருமிகளால் ஏற்படாது பரம்பரை மற்றும் வாழ்க்கை முறையின் காரணமாக உருவாகும் நோய்களாக கருதப்படுகிறது. அவற்றில் சில

Ø இருதயம் சம்மந்தப்பட்ட நோய்கள்
Ø நீரழிவு நோய்
Ø உயர் குருதிஅமுக்கம்
Ø நாட்பட்ட நுரையீரல் சம்மந்தப்பட்ட நோய்கள்
Ø புற்று நோய்
Ø பக்க வாதம்

நாம்தான் நல்ல திடகாத்திரமாக இருக்கிறோமே நமக்கெல்லாம் இந்நோய்கள் எங்கே வரப்போகிறது என்று அடம்பிடக்காமல் வாருங்கள் ஆபத்துவிளைவிக்கும் காரணிகள் என்னென்னவென்று ஆராய்வோம்.

Ø உயர்இரத்த ஆழுத்தம்
Ø குறைந்த உடற் பயிற்சி
Ø இரத்தத்தில் அதிகளவான குளிக்கோசு
Ø உடலில் மிகுதியான கொழுப்புச்சத்து
Ø மிகுதியான உடல் பருமன்
Ø புகைபிடித்தல்
Ø மதுப்பாவனை
Ø குறைந்தளவில் காய்கறி, பழவகைகளை உணவில் சேர்த்தல்
Ø அடிக்கடி மன அழுத்தத்திற்கு உள்ளாதல்

மனதைத்தொட்டுச் சொல்லுங்கள் குறைந்தது மூன்று ஆபத்துவிளைவிக்கும் காரணிகளாவது உங்களுக்கும் இருக்கும். பயம் காட்டவில்லை இது நம் வாழ்க்கை நாம்தானே தீர்மானிக்கவேண்டும்.
நம்மையறியாமலே நமது வாழ்க்கைமுறை, உணவுப்பழக்கங்கள், பரம்பரைக்காரணிகள் என்பன வருங்காலத்தில் உலகின் உயிர்கொல்லி நோய்களாக உருவெடுக்கப்போகும் தொற்றும் தன்மையற்ற நோய்கள் முன்னால் நம்மைக் கொண்டுபோய் நிறுத்தப்போகிறது என்பதுதான் கசப்பான உண்மை.

இப்படித்தான் வாழவேண்டும் என்று வற்புறுத்தவில்லை , இப்படி வாழ்ந்தால் நாமும், நம்மைச் சார்ந்தவர்களும் நலமோடு வாழலாம் என சொல்ல விழைவதே இத்தொடர் பதிவுகளின் நோக்கம்.
எனவே வரும் பதிவுகளில் மேற்கூறிய ஆபத்துவிளைவிக்கும் காரணிகளில் இருந்து நம்மை விடுவிக்கும் வழிமுறைகள் பற்றி விரிவாக ஆராய்வோம்.

வணக்கம்

2008-09-13T19:07:00.000-07:00

மருத்துவம் மூடுமந்திரமாக இருந்த காலம் மலையேறி வெகுகாலம் ஆகிறது. எனவே இப்படித்தான் வாழவேண்டும் என்று சொல்லாமல் இப்படி வாழ்ந்தால் நாமும், நம்மைச் சார்ந்தவர்களும் சுகநலனோடு நீண்டநாட்கள் வாழலாம் என்ற எண்ணத்தின் அடிப்படையில் இவ் வலைப்பூ ஆரம்பிக்கப்பட்டுள்ளது.

வாங்க பகிரலாம்

நொவெல் இன்புளுவென்சா ஏ - எச் 1 என் 1 வைரஸ் / Novel Influenza A H1 N1

பாம்புக்கடி - தவிர்க்கும் வழிமுறைகள்

மாரடைப்பு, கொலஸ்ரோல் படிவு - வீடியோ விளக்கம்

Understanding Asthma - Video Animation

அபாய அறிகுறிகள் -டெங்குக் காய்ச்சல்/DENGUE FEVER

பாம்புக்கடி - NEGLECTED TROPICAL DISEASE

காச நோய் - சில உதவிக்குறிப்புக்கள்...

காச நோய் - TUBERCULOSISகாச நோயற்ற உலகு.கலவரம் தரும் நிலவரம் - காசநோய் TUBERCULOSIS

கலவரம் தரும் நிலவரம் - காசநோய்(TUBERCULOSIS )

முறையான சிகிச்சை மூலம் பூரணமாக குணப்படுத்தக் கூடிய காசநோயினால்

காச நோயற்ற உலகு..

காச நோய் - TUBERCULOSIS

கொஞ்சு(ச)ம் க(வி)தைகள்: இலங்கையில் ஒரு தமிழனின் சாதனை

வாங்க பகிரலாம்

வணக்கம்

காச நோய் - TUBERCULOSIS
காச நோயற்ற உலகு.
கலவரம் தரும் நிலவரம் - காசநோய் TUBERCULOSIS